Estudante Secundária An-nur Nain 182 Partisipa Diskusaun Livru Chega!

Dili – (24 Maiu 2024), Centro Nacional Chega! Instituto Publiku (CNC I.P) liu husi Divizaun Edukasaun no Formasaun (DEF) servisu hamutuk ho Eskola Sekundaria Jerál An-nur mobiliza estudante nain 183 partisipa iha dikusaun livru Chega! Ho Tema ”Historia Konflitu no Violasaun Direitus Umanus iha Timor-Leste”.

Diskusaun Livru nu’udar atividade regulár ne’ebé Centro Chega! halo ho nia objetivu, foinsa’e liu-liu estudante sira hatene ita nia istória no memória ne’ebé kontribui ba Timor-Leste nia ukun rasik an.

Aleinde hatene istoria, atividade diskusaun livru nu’udar forma ida atu enkoraza estudante sira atu hanoin, halo reflesaun no diskusaun kona-ba sa mak akontese iha pasadu hodi sai lisaun atu la repete tan iha futuru.

Hafoin hala’o diskusaun, estudante sira halo leitura ba livru istória ne’ebé prezerva iha Biblioteka Centro Chega!. Iha vizita mos exibisaun istóriku ne’ebé prezerva iha Centro Nacional Chega!I.P.

Entertantu atividade diskusaun livru no vizita Biblioteka hala’o durante semana ida hahu iha loron 20 – 24 Maiu 2024. Tuir planu atividade ida ne’e sei kontinua ba eskola Sekundária sira seluk iha Dili nomos munisipiu sira.