Dili: Atu aumenta koñesementu estudante sira nian kona-ba papel Provedor de Direitos Humanos e Justiça inklui proteje direitus umanus no governasaun di’ak. Maka Provedor de Direitos Humanos e Justiça (PDHJ) liu husi diresaun Promosaun, Tersa ohin fasilita disseminasaun ba estudante Ensino Secundária Annur, iha Campo Alor, Dili.
Disseminasaun ne’e rasik loke husi Sekretariu Ezekutivu, Ambrosio Graciano Soares, ne’ebé maka iha nia diskursu hateten, Provedor de Direitos Humanos e Justiça hanesan instituisaun independente estadu nian, ne’ebé maka hamri’ik ho nia papel hodi proteje no promove direitus umanus no governasaun di’ak.
Nia hatutan, direitu ba estudante sira signifika katak, estudante sira iha direitu atu asesu ba edukasaun ne’ebé maka di’ak, iha direitu atu hetan materia husi Professores sira no Professor sira mós iha dever atu labele abandona aula durante prosesu aprendijazen tanba ne’e viola direitu estudante sira nian hodi asesu ba materia.
Alende ne’e formador sira husi PDHJ lori mós materia kona-ba, trafiku umanu, direitus umanus baziku, papel PDHJ, nomos Igualdade Jeneru.
Entretantu disseminasaun ne’e rasik hala’o iha loron sorin de’it no hetan partisipasaun masimu husi estudantes no Professores sira balun ne’ebé maka kurioju tebes hakarak atu hatene klean kona-ba papel PDHJ nian inklui oinsa maka atu proteje sira nia direitu hodi asesu ba edukasaun no direitu sira seluk tan inklui governasaun ne’ebé di’ak.
